عيد سعيد مفتوح

عيد الفطر يوم20 ..وقبلها بيوم الوقفة بس الفرق إن الوقفة السنة دى غير كل سنة الواقفة السنة دى واقفة جماعية ..العالم كله هيقف فيها
هيقف في مؤتمر او جامعة أو حتى على الإنترنت علشان يقول كلمة عن حرية جديدة غير حرية المرأة والرجل (مع إحترامنا لتلك الحريات)لكن
الحرية السنة دى حرية التطوير..حرية الإبداع ..حرية إستكمال ما بدئه الأخر ..وقبل كل شئ حرية إستخدام
مش من حق حد ياخد منى ضريبة على المياة ..أو الهواء ..مش من حق حد يقوللى جرب الجو هنا ولو عجبك هتدفع مقابل كل زرة إكسجين هتستنشقها
كمان مش من حق حد يدفّعنى مبالغ طائلة علشان أقدر أستخدم أهم وسيلة في حياتي ألا وهى الكمبيوتر
وهو الكمبيوتر إيه غير نظام تشغيل وشوية برمجيات فوق بعض ؟


الحرية اللى بيطالب بها العالم يوم الوقفة 19-9-2009 وينادي بها كل عام هى حرية البرمجيات
مش بنقول عاوزين ويندوز ببلاش ولا عاوزين جهاز لكل مواطن هدية -ولو إنه ضرورى


لكن بنقول..ليه ناسي إن فيه برمجيات أكوادها مفتوحة يقدر المطور يعدل فيها زى ما يحب ..يقدر يخليها ملائمة لاﻹحتياجاتى ..ودا بالنسبة للمطورين والمبرمجين ..
وبالنسبة للمستخدم العادي؟؟
أنا كمستخدم عادي يا أساتذة فتحت عيني على كومبيوتر سمعت صوت فتحة الويندوز وأصبح الأوفيس معلم من معالم حياتى وأصبح إنترنت إكسبلورير كلمة مرادفة لكلمة إنترنت عندى ..مفتوح إيه ومقفول ايه صباح الخير!!
أقولك انا بقي مفتوح إيه ومقفول إيه ..طبعا الحرية في الأول أو في الأخر ليك زى ماحنا منحبش حد يجبرك كمستخدم من خلال الإحتكار على إستخدام نظام أو برنامج معين ..منحبش نجبرك على إستخدام حاجة مش بتوفي إحتياجاتك ..لكن ..جرب
جرب نظام جديد هيبين إمكانيات جهازك وسرعته .
.جرب تحصل على نسخة أصلية من برنامج أو نظام تشغيل مجانا بدون شاشة سوداء و
إنذار بإن نسختك مش أصلية أو إنها تجريبية وقربت تخلص ..
جرب تستخدم حاجة جديدة ..إشمعنا دى إللى مزهقتش منها ..معقولة؟
جرب وشجع المبرمجين الجدد وإللى بفضلهم ممكن الإقتصاد القومي يزيد لو قدروا ينتجوا برامج قوية مبنية على البرامج مفتوحة المصدر -واللى زى ما ذكرنا قبل كدا بتتيح لهم التطوير-ويسجلوها بإسمهم ويقدروا يكسبوا منها من غير ما يخلوا المستخدم العادى يدفع كتير


المستقبل و الإقتصاد والرفاهية في
صناعة التكنولوجيا ..والصناعة دى في بلدنا راكدة واللى ممكن يصحيها ،حاجة زى البرامج مفتوحة المصدر إذا إنتشر إستخدامها وتطويرها ..


خليك حر...وإستخدم البرامج مفتوحة المصدر
واكب العالم في التطور والتغيير وتحرك معه للأمام